Gizonak goapoago hiltzen dira

Maria Angeles Durán.

Ekainaren 17 eta 18an EHUko Udako Ikastaroetan izan naiz. Ikastaroaren izenburua: “Berdintasunerako garaiak? Denboraz, generoaz eta gizarte antolaketaz hausnarketak”. Maria Angeles Duránen hitzaldia bikaina izan da.

Gauza interesgarri asko esan zuen Duránek eta kontatzeko modua ere ondo erakargarria izan zen. Galdera bonbardaketa egin zigun entzuleei. Horietako batzuk jasoko ditugu labur-labur:

Zer da denbora? Ikuspegi ekonomikotik baliabide urria.  Zenbat denbora daukagu? Batetik, egunero 24 ordu, eta bestetik, bizi zikloa, faktore sozialek erangindako bizi zikloa. Denbora izatea beti ona al da? Denbora baliabide baino obligazio bihurtzen bada? Eta kontsumo bihurtzen bada? Nork dauka denbora gehien? Emakumeak, geroago hiltzen baita batez beste. Biologiak indartsuago egin gaitu. Aborto naturaletan, hildako feto gehiago dira gizonarenak emakumearenak baino. Beste kontu bat da bestelako arrazoiengatik jaiotzera ere iristen ez diren (Indian eta Txinan adibidez) milaka eta milaka feto emakumezkoak.

Duránek lagun batek zioena gogora ekarri zuen: Gizonak goapoago, aberatsago eta konpainia onean hiltzen dira. Zergatik? Bizitzan zehar gutxiago izorratzen direlako, denbora saldu egiten dutelako (emakumeei desjabetu egiten zaie denbora) eta beraiek baino gazteagoa den emazteaz inguratuta egotea lortzen dutelako.

Duránen gomendioa aretoan gaudenoi: Ez erosi Estatuko bonuak, izan ezazue alaba bat, hark izango du denbora zuei erregalatzeko.

Algarak entzun dira aretoan.